https://www.patreon.com/posts/56030039
極端無恥移民撚系列（一）：極無移撚乞人憎不在於走，而在於抹黑留低嘅人／Survivor Guilt係移民最低消費
系列前言：每當講到「留與走」呢個問題之時，我發現移民走佬嘅人都會有兩個好極端嘅反應：一種係覺得自己好冤屈，明明自己係有好多迫得不已嘅理由先會離開香港，點解仲要比人批鬥？另一種則係覺得自己明明作出咗最明智嘅決擇，所謂走得摩無鼻哥，點解仲有班蠢人唔明白自己唔走有幾蠢？
掉番轉，好多攻擊移民KOL嘅人，都被誤解成「人地走難都要屌，係要想要情緒勒索」，然後果班無恥移民KOL就躲藏響呢種論述之中，繼續腐化香港抗爭論述。
所有爭拗，其實都係要建基於共同基礎上面，我發現「留與走」嘅爭拗好多時候都唔係講緊同一層次嘅嘢，最尾只變成毫無意義嘅雞同鴨講。所以我決定開創呢個「極端無恥移民撚系列」，唔單止係要聲討一班欺世盜名搵笨七嘅移民KOL、分析佢果班支持者嘅心態，同時亦都希望理清番一啲攻擊「極無移撚」嘅論據，就算唔同意我都好，至少大家企番響同一個層次上面進行爭拗，搵番辯論嘅意義之餘，亦令班真正需要聲討嘅「極端無恥移民撚」無所遁形。
===
雖然我同張崑陽響政見上南轅北轍，但至少佢響接受傳媒講咗以下兩段嘢，係令我對佢有番多少尊重：
1. 他形容每天都在自我批評，「無力感都大，我會問香港面對這麼多苦難，《蘋果》（日報）都玩完了，制裁有什麼用？高官繼續出糧……」
2. 「離開了戰友，使我對未能跟他們齊上齊落深感愧疚。離開了香港這片土地，有了地域的界限，感覺再不能跟共同體同氣連枝又是十分痛苦。」
其實好多反對極端無恥移民KOL嘅人，一向對為勢所迫受到政治迫害嘅流亡者，甚至因為唔同原因，需要離開香港移民他國嘅一般人都係非常包容──年紀稍大嘅，好自然都經歷過1989、1996兩次移民潮，我仲記得89年果陣我讀官立小學，去到畢業果刻成班經已唔見咗一半人去哂移民。根本香港就係一個移民嘅民族，向外發展從來都係我地嘅本性。
但我覺得如果你離開香港後仲以香港人身份自居、甚至乎以「香港抗爭者名義」進行各種籌款，咁至低限度我希望你有兩種自覺：
一、老老實實承認，響海外打國際線就係無乜用／近乎無用，作為一個無任何政治籌碼響手嘅香港人，你所能做到嘅係好有限；唔好裝西裝食餐飯就講到呢個果個政客因為你支持香港、形勢大好乜乜七七，然後靠果幾幅相走黎呃錢。
二、要清楚自己今日雖然走得甩，但背後仲有千千萬萬個香港抗爭者響香港受緊苦，所以有內疚感亦係理所當然。即係我好奇怪有班黃屍好鍾意講：「你地無欠香港、唔駛內疚架！」作為一個長期參與抗爭嘅一員，點可能無內疚感？
唔好講移民，剩係你響最前線見倒有人被拉被打而你自己走得甩、你企響中後線見倒前面冒住風險食哂海棉彈布袋彈而你好彩無事，有內疚之心係好正常嘅事。有義士響牢獄中叫大家唔好有Survivor Guilt話咁樣係於是無補，但呢個根本就唔係你應唔應該有嘅問題，假若你有投入過場抗爭，又點可能無Survivor Guilt？
除非你根本唔當戰友係戰友、又或者成場抗爭你從來都只係作為冷氣軍屍響鍵盤前面打風涼說話同捉鬼，否則係無可能無呢種Survivor Guilt。而我對於所有選擇移民離開香港嘅人嘅最低要求，就係帶住呢份Survivor Guilt去海外展開你嘅新生活，響你往後評論香港任何嘢之前，都要記住比起留響香港繼續奮鬥、受苦受難嘅人，你係響安全地方Take緊一個Advantage。
至於你響國外搞唔搞國際線、仲關唔關心香港，我覺得反而唔重要；你響海外適應倒新生活、融入當地社會、甚至忘記香港成為「海外華人」，我都只會給予祝福。事實上從來無人可以被要求一生一世都成為抗爭者，每個人都有自己追求幸福嘅自由。
真正討厭嘅「極端無恥移民撚」從來都係講緊果啲，自己踩撚住手足屍骸走佬之後，仲要極度無恥覺得自己移民走佬精明過人，一日到黑販賣恐懼抹黑香港以證明自己嘅選擇係「正確」，仲要對留響香港嘅人踩多兩腳話佢地唔走就係笨實、只配做中共人質無所作為，卻連些少離棄「手足」嘅內疚感都無。呢班極端無恥移民撚先係我專注狙擊嘅對象。
Search